早前一眾「LC煲迷」通宵達旦排隊，仆晒地，為咗搶呢個「廚具界LV」、法國品版Le Creuset，相信呢一幕大家仲係記憶猶新。之但係唔好以為廚具得女fans，動新聞找來一對LC迷夫婦 Jeffrey 同Florence，佢哋去旅行時除咗買衫、買褲之外，就係買LC產品。而Jeffrey比佢老婆更迷LC，點解咁得佢歡心呢？
Jeffrey話：「6年前有一次太太去美國公幹，然後買咗一件產品返嚟，見到覺得好靚，首先被顏色吸引咗。」就係咁，開始越儲越多產品。Jeffrey 最愛橙、紅色，佢哋買嘅過百件LC產品保持估計總值約十萬港幣！齋攞晒出嚟已經要兩個鐘，難怪女主人Florence話唔見咗要報警。
平時負責下廚嘅 Jeffrey又話：「LC產品係我partner！因為每日對住一兩個鐘煮飯。」仲話要去煮、去用，先會鍾意佢，連老婆Florence都呻老公同啲煲嘅感情就嚟好過對佢。Jeffrey笑住解釋，因為每日返工放工，工作量同壓力都好大，所以佢減壓嘅方法就係煮嘢食。
咁多收藏入面，Jeffrey 話最愛係紅色花花豉油碟，因為身為馬拉人嘅佢，每食一餐都要辣椒豉油，所以豉油碟係佢一定會用！講到最瘋狂一次掃貨，就係佢地三個月前去大阪，又去Outlet同百貨公司搵LC，幾個地方買咗總共30件產品左右。Florence坦言，有啲產品真係只用來裝飾，從來沒有用過，例如有一款鹽和胡椒瓶，只係因為覺得靚所以買。
不過，早前綠色和平測試發現，品牌嘅橙紅色陶瓷碗，當時含鉛量超標，直指鮮艷顏料可能係鉛超標元兇。Jeffrey 聽完之後完全冇憂慮咁話會照用，Florence 就話都冇聽過有人因為用LC煲而死，果然係真fans！