近年唔少銀行重組業務架構，好似滙控（005）早幾年密密出售資產，唯獨對內地投資不減，最近就委任滙豐中國常務副行長兼執行董事何舜華（Montgomery）多一項職務，就係出任滙豐中國廣東行政總裁。
何舜華擁有超過30年銀行經驗，佢自2010年底起，擔任獅子行中國工商金融服務總監，真係北望神州，舊年1月佢升任滙豐中國常務副行長，管理多個業務部門，如今睇多瓣廣東，應該難佢唔到。
現時滙豐已經喺廣東設有分行，何舜華上任將會打造更全面嘅零售銀行與財富管理服務，並落力擴展中型企業與中小企業客戶群，而且仲要繼續增聘人手。按滙豐亞太區行政總裁王冬勝9月時所講，成個珠三角會增聘4,000名員工，咁廣東作為滙豐中國嘅重點業務區域之一，相信陸續會有新任命。