久保田利伸醉心黑人音樂，EXILE中有黑人成員，就連日本妹都好like黑人，所以好難想像黑人會喺日本俾人種族歧視，但大阪飛腳嘅黑人前鋒安達臣柏德列就慘成受害者。前日呢個巴西球員喺日聯季後賽準決賽入一球，協助球隊加時以3:1淘汰浦和紅鑽，賽後佢話喺自己個Twitter俾個疑似係紅鑽球迷留言鬧佢係「死黑鬼」。飛腳事後亦有跟進，喺官網上表示對種族歧視係零忍容，而且會同日職聯賽會通力合作對抗種族歧視。查實紅鑽球迷有前科，試過喺比賽時拉起寫有「只限日本人」嘅橫額，結果搞到紅鑽史無前例咁被罰閉門作賽。睇嚟紅鑽要正視呢個問題至得。