雄霸重量級拳擊壇多年嘅烏克蘭拳王傑素高，上周六喺德國杜塞爾多夫爆冷以點數輸畀挑戰者英國嘅富利，慘逢11年嚟首場敗仗；俾對手一次過搶走晒啲金腰帶嘅傑素高自然唔忿氣，相信佢兩個好快就會擇日重賽。
39歲嘅傑素高同27歲嘅富利打足12回合，最後三位裁判一致裁定富利以點數勝出；富利仲將個人職業生涯戰績改寫成25勝0負，佢賽後好激動咁話：「雖然我唔係第一個成為重量級拳王嘅英國人，但我諗我係第一個成為重量級拳王嘅愛爾蘭人。」佢亦想將勝利送畀家人：「我噚日知道老婆有咗，我哋即將迎接第三個細路。」富利嘅老竇約翰都對囝囝讚不絕口：「之前冇人睇好富利（富利賽前勝出嘅賠率係五倍），但佢最終喺傑素高呢個超級拳王手上搶走晒啲金腰帶！」
新科拳王唔怕重賽
傑素高輸咗呢場，除咗11年不敗紀錄告終，仲俾富利一次過擸走哂WBA（世界拳擊協會）、IBF（國際拳擊聯會）、WBO（世界拳擊組織）同IBO（國際拳擊組織）四條重量級拳王金腰帶。問到有冇可能重賽，經理人邦迪就話傑素高好大機會發起復仇戰，因為雙方所簽嘅合約包含重賽條款。富利就話唔驚手下敗將：「我係一個戰士，所以我會接受一切挑戰；我相信下次比賽會好有趣。」