【本報訊】一手一腳修建南生圍內不同的木橋，譚伯的真正身份除是南生圍村民外，還是經營橫水渡的東主。以為他為爭取橫水渡客量而修橋？非也。早年做飲食業的譚伯，約4年前退休，碰上橫水渡經營困難，後繼無人才接手經營，但修橋經驗卻有20年。
住在南生圍逾40年，目睹南生圍由以前養魚養蝦，到現時變成旅遊景點；部份子女在南生圍出生、成長，譚伯可算在南生圍落地生根。橫水渡路程短，上船後船伕撐一會，兜一個彎，乘客便要上岸。索價每程6元，單車另加一元，記者多次到訪均遇同船乘客議論：「嘩轉個圈就上岸，乜咁貴㗎！」譚伯解釋，橫水渡只得微利，「搵唔到食㗎！橫水渡都係要蝕㗎！」
南生圍橫水渡是香港現存唯一以人力推動的水上交通工具。平日遊人不多，譚伯稱，生意額只能靠假日彌補，「遇上假期天氣唔好，就蝕梗㗎喇」。除了維修保養及保險費用，譚伯更要花錢聘用船伕，預計今年年底埋單計數，也是虧蝕居多。
「好多人以為我哋㩒住搶」
人力推動是橫水渡的特色，也是橫水渡的最大成本。「請啲人返嚟做，五、六十蚊一個鐘，又要勞力」，橫水渡朝六晚十一，幾乎有乘客便會立即開船，只是聘請船伕開支，每日已近千元。譚伯指，橫水渡收費非由他訂，而是由鄰村放出橫水渡經營權予譚伯時一併訂立，「好多人都唔明白，以為我哋自己想幾多錢就幾多錢，好似㩒住搶咁」，他說一人過河時船伕看似輕鬆，六人過河時，船伕卻要出盡力才能將船撐到對岸，但乘客則以為船主賺大錢。
縱然橫水渡可能只有微利，但譚伯指人已退休，「搵多搵少都唔係問題」。譚伯帶記者由橫水渡碼頭走到婚紗橋，邊行邊講解，途中經過寫有「開心橫水渡」的告示牌。「譚伯，開心橫水渡個名係你改㗎？」「係啊，開心好吖嘛！」譚伯笑着說。
■記者周詠雯