滙豐今年150歲生日，年初時發售過一批面值150元嘅紀念鈔，發行量高達200萬張，曾經掀過一陣炒風，原來呢筆收益淨額高達4.77億元，咁大筆錢係咪諗住派畀股東呢？唔好意思，滙豐係諗住捐晒畀慈善機構。
其實賣呢批紀念鈔前，滙豐講明賺到嘅錢會回饋港人，作為答謝市民嘅心意。滙豐噚日喺中環總行舉行「滙豐社區節」啟動儀式時宣佈此事，當中3.77億元交由滙豐慈善基金，撥去做教育、醫療、環保三大主題，餘下1億元捐畀公益金。
滙豐香港區總裁、中葡混血兒施穎茵（Diana）跟佢上司、大中華區總裁黃碧娟噚日一齊陪住政務司司長林鄭月娥欣賞啟動儀式嘅活動。