講到政治，資深政壇老手、立法會主席曾鈺成可算係權威，但原來唔只實戰經驗，就連「政治」一詞嘅出處，曾主席都識，仲糾正政治新丁、立法會會計界議員梁繼昌嘅錯處㖭！
立法會辯論由民建聯陳克勤提出，呼籲各界「放下政治爭拗」，促特區政府推動社會集中討論發展經濟同改善民生，向來英文了得嘅梁繼昌，就話想將個討論提升到一個層次，先睇睇乜叫「政治」，認為政治同經濟民生密不可分。
指梁繼昌解錯politics
佢話喎，「政治」最簡單嘅定義，國父孫中山都講過，就係「眾人之事」，繼而話「政治」兩字嘅中文，都係近二百年先有，英文「politics」則源自古希臘文「poly」，即係「好多」嘅意思，亦即係國父所講嘅「眾人之事」，佢認為政治係一班人搵共識嘅過程，所以有政治爭拗係常態。
在席主持會議嘅曾主席最初冇即時指正，但人力議員陳偉業喺梁繼昌發言後要求點人數，令曾主席有空檔，結果忍唔住出口，笑住向梁繼昌話，politics其實係源自希臘字「polis」、亦即係「城市」咁解，同時笑指梁繼昌將希臘嘅中文亦讀錯，指「臘」字應該讀成「臘肉個臘，唔係獵人個獵」。
梁繼昌之後喺fb留言，話呢次討論好有意思，亦多謝主席嘅意見，會虛心接受，但都補充一句，網上嘅文憲對「政治」英文起源有唔同解讀喎。香港國際關係學者沈旭輝亦加入戰場，喺fb話politics字根係polis，通常譯做城邦，而城邦通常有真自治。