林雅詩同仙樂都噚日喺中環出席「第十屆香港電單車節」，林雅詩老公溫文英近日被爆出軌，令佢決定離婚，林雅詩上星期又因為腸胃唔舒服入急症室，佢噚日谷胸現身，全程強顏歡笑。
囝囝唔停喊
問到上個禮拜急性腸胃炎入院，老公溫文英有冇問候？林雅詩話：「佢唔知，只係睇咗報章，不過之後都有打過畀我，我同佢解釋番件事。」咁係慰問定質問？林雅詩話：「普通啦。」講到離婚搞成點，林雅詩話：「𠵱家交晒畀律師處理，我已經簽咗，唔知道佢幾時會簽。」係咪已經心死？林雅詩答：「都會㗎，我好想好好哋傾吓，對方唔肯傾。」
林雅詩話出院後返咗廣州做嘢，幾日冇見囝囝，兩母子靠視像通話：「同佢傾完電話仲心噏，佢唔停喊，佢突然又去咗婆婆屋企，小朋友好擔心我，佢好明事理，好多嘢我唔敢同佢解釋，等我媽咪同佢講。」有指夫妻離婚後小孩撫養權政策會變，林雅詩話有啲擔心，希望離婚後可照顧囝囝。
撰文：馮仁昭
