之前睇過啲網上專頁，用巴塞隆拿嘅「MSN」組合去寸利物浦、曼聯廢，話人哋三個人嘅入波仲多過你成隊，好心就檢討吓，但我求大俠唔認同，而係調番轉覺得，MSN實在太屈機！上周六，美斯、尼馬同蘇亞雷斯包辦四個入波，幫巴塞主場以4:0大炒皇家蘇斯達，MSN喺今年射入125球，多過五大聯賽所有球隊，就連拜仁慕尼黑同巴黎聖日耳門，各自加埋都唔夠佢哋三個多。
美斯阿蘇尼馬轟125球
早排美斯傷咗，尼馬同蘇亞雷斯擦出花火，到美斯傷癒復出，佢哋三個就更加如入無人之境，入波好似食生菜咁易。炒完皇家馬德里同羅馬之後，巴塞上周六喺魯營對皇蘇，MSN繼續刷數據。首先要多謝右閘丹尼爾，上半場送出兩次助攻，尼馬同阿蘇各入一粒，領先2:0。值得一提嘅係，阿蘇入嗰球幾靚，係第一時間窩利抽射。53分鐘，尼馬射入個人第二球，巴塞拉開到3:0。尼馬同阿蘇已經入到波，但點可以少咗美斯份！
尼馬就正正係咁諗，補時助攻美斯射成4:0埋齋。尼馬賽後都話，「係呀，我最後一直都想造就美斯入波，佢成日幫我哋，我都想佢入到。當美斯同阿蘇入波，我開心，當我入波嗰陣，佢兩個都一樣咁開心。」巴塞贏咗呢場後，聯賽六連勝，繼續排西甲榜首。
拜仁全隊加埋都少一球
MSN攻力沒法擋，教練安歷基話𠵱家巴塞仲勁過舊年拎三冠王嗰陣。有記者問安帥巴塞係咪勁得好恐怖，佢話：「你可以問吓我哋嘅對手！」美斯曾經講過，希望嚟緊金球獎嘅三甲就係MSN，好多人都話佢識講嘢，但我求大俠覺得若果MSN真係雄霸金球獎三甲，亦係實至名歸，因為佢哋三個嘅攻力已經可以頂人哋成隊波。單計2015年，美斯入咗44球，尼馬就有41球，至於阿蘇就入40球，三個夾埋幫巴塞入咗125球！
除咗入160球嘅巴塞外，歐洲五大聯賽攻力最強嘅就係拜仁慕尼黑，今年入咗124球，佢哋前日喺德甲入得兩球，主場贏哈化柏林2:0。至於攻力排第三嘅係巴黎聖日耳門，前日以4:1大炒特魯瓦，累積120球，所以話，MSN三個仲勁過「聖仁」。