商業冠名贊助賽今季冷Win當道，早半個月先後由10倍「人強馬勁」及18倍「飛來猛」勝出莎莎婦女銀袋賽及樂聲盃。
這天第八場跑戲肉其士盃一班1600米爆得仲杰，79倍全場次冷的東廐馬「萬事勇」，夥拍吳嘉晉神奇地一放到底，情況似足早排「飛來猛」贏樂聲盃，告東尼同吳嘉晉師徒攜手捧盃，前者重返榜首，拍住同得16Win的沈集成，吳嘉晉則打破自9月16日勝出「榮光大道」後兩個半月的齋缽，這天之前吳嘉晉於季內沙田賽事44戰只得兩季，從未入Ｑ，是沙田盲門騎師。
「萬事勇」馬主張祖昌與太太伍燕梅打開今季勝門，是整個「萬事」系馬季內首捷。六歲馬「萬事勇」對上三季共六捷，這天則係今季初次建功，亦係歷來第一次在1400米以上途程勝出。其士盃其實利冷唔利熱，上屆頭馬「隨心隨意」20倍，此駒今仗與韋達重逢打衛冕戰，可惜無功而還跑尾三。
大馬主李子彬今場雙龍出海，結果冷啲嗰匹「豈等閒」由何澤堯後上跑第二，搭「萬事勇」連贏位着綠燈畀落飛黨扑中，都派4,856元。第三名係贏完樂聲盃續配鄭雨滇加程的「飛來猛」，呢條華將三重彩派五萬八千幾，第四名係史卓豐冷門座騎「好靚仔」，四重彩派20萬鬆啲，嚴重偏少。