天真許以往約食日本料理，多數去置地廣場嘅「賀菊」，天真許與左丁山皆係「賀菊」與其前身「弁慶」嘅熟客，食到慣，入到去就有相熟經理招呼，點菜都唔駛，自有一位相熟女經理Kenny搞掂，次次OK。唔知點解，美心集團將「賀菊」收埋，原來地方改成開放式餐廳，走Simplylife嘅路綫，冇人招呼，價錢雖然平咗一啲，但天真許同左丁山都覺得氣氛唔同晒，冇去幫襯咯。
呢日天真許又話食日本菜，地點係Zuma，位於約克大廈6字樓，侍應全部講英文，中午幾好生意㗎，但弊在貴夾唔飽呢，成五百蚊一個定食午餐，叫甜品要另外加錢，食完都係肚仔餓，點算好？食完行街之時，行經IFC之Simplylife，就用20元買一個muffin醫肚，返到公司再食，一路食就想起往日在賀菊，與天真許食到興高采烈，不知幾過癮，以後難有呢支歌仔唱咯。Zuma只係適合一啲高級OL與外籍男女光顧，夠型吖嘛。
在IFC碰到多年不見之肥仔R，大家交換本地商場及內地營商消息，幾乎傾到腳軟。肥仔R原來又係天真許英皇師弟，話讀書時，完全未聽過CY之名，現在回想起，實在非常佩服CY師弟可以咁深藏不露，「大隱在校」，卒練成一身治港功夫。唉，唔好講CY啦，講啲過癮事件好唔好，肥仔R話昔年天真無邪，大老闆叫佢坐私人飛機直飛倫敦渡周末，以為老細明益佢，點知去到酒店就見到有美女迎接老細上房，自己成日孤伶伶。次早老細電話到，叫佢去食早餐，靚女在座，老細話：「唔該幫吓手陪佢去牛津街一帶行街買嘢，我約咗賓架去打波。」食完，大家前後腳離開酒店，老闆在最前，靚女緊貼肥仔R身傍，好似拍拖咁，最初R不知所措，但如果佢冇番咁上下聰明，老細點會叫佢去倫敦吖，好快就醒悟到，如果在街上碰到有狗仔隊影相或老闆親友，老闆就可以完全置身事外。但如果在牛津街碰到自己嘅朋友，咁又點，哈哈，自己執生啦。
與老闆私下食飯有無獎賞？有，升級加薪快啲囉，但做得幾年，就覺得自己係老細24小時家臣咁款，老婆非常不滿，卒之都係辭職鬆人。