【本報訊】民主黨中西區今屆有一對孖寶誕生，中環區許智峯與半山東吳兆康區選報捷，打亂建制派「燒瘋鴿」的如意算盤。抗爭之路不好捱，又抬又拉又被告，孖寶卻堅持民生與政治應雙軌並行，與建制派一樣，同樣會搞街坊蛇宴，席間唱的卻是《問誰未發聲》；中環行人扶手電梯地下至半山沿途，憑社區政治教育軟着陸，進「激」的孖寶，殺出新血路。
記者：許偉賢
於2011年當選中西區區議員的許智峯，去年踢爆區議會黑箱通過《基本法》撥款，自此展開區會罕見的激烈抗爭運動，試過在議會被抬走，也在民政事務署外靜坐，許太抱着囝囝隔着玻璃探訪，同路人還有鏡頭外的吳兆康。每次許智峯被抬，吳兆康總是在旁；連被建制派議員控告誹謗，兩人也拍住接傳票。
「民生政治不能分割」
「𠵱家要抬人，都有多個人要抬嘞！」33歲的許智峯笑着說。較他年長兩歲的吳兆康過往只是中西區增選委員，今屆一擊即中砌低爭取連任的張翼雄。過往區議會少見激烈抗爭，被打成激進派的孖寶，逆流在被認定不應談政治的社區，高調宣傳民主教育，「其實中產係好關心制度，唔只講馬路嘅垃圾，所以我由頭到尾都幾政治，想突出番民主派嘅價值」。吳指主動談政治比有政治潔癖好，能令市民明白民生與政治不能分割。
而在社區推動民主與政治教育，許稱必須透過軟着陸：「好似搞地區蛇宴，佢哋（建制派）唱嘅歌會係鄧麗君，但我哋唱《問誰未發聲》、《一起舉傘》；我哋唔會好突兀咁話一齊支持雨傘運動，但會用一首歌講畀大家聽社會嘅分歧、知道民心嘅背向；其實（區議員）可以好政治，亦可以好社區，兩樣嘢可以結合埋一齊。」
許智峯的區會抗爭之途一直未獲部份黨友支持，他稱反而激起其鬥心：「有啲人話你搞咁多政治，不如做番多啲民生嘢啦……我哋兩個都認為點解唔可以政治工作做得好，民生工作都可以兼顧呢？」兩人同時在地區深耕細作，解決街坊的疑難雜症，許說：「如果你係切切實實幫到居民，就算你激啲都好，居民都相信你為佢哋發聲。」
逼建制派投票表態
孖寶預告未來在區會仍會抗爭，「如果你（政府或建制派）係唔公道，我哋會搞到你開唔到會；我哋入到去唔係做花樽，唔係投完票就走人」，同時會要求多談政治議題，許說：「以後要逼佢哋多講政治、逼佢哋投票，等選舉時畀大家睇到，邊個先係真正嘅民主派。」