最近百貨到奢侈名牌都話割價促銷，大家越想守得住荷包，結果係買得仲多。品牌及市場策略專家Martin Lindstrom對呢種購物衝動形容得好貼切，指多數消費者都係非理性購物。
呢種非理智購物衝動相信會由本地蔓延到外旅。港元同美元掛鉤，喺美元強勢下，其他貨幣兌美元貶值壓力加劇，港紙兌換其他貨幣又平咗，推動大家出國血拼。除咗留意美元升值，歐元貶值亦不可忽視。今個星期等歐洲央行會否再擴量寬，歐元再跌將牽連多隻亞洲貨幣。年初至今，歐元等兌港元累跌14%；歐元兌日圓同新台幣亦累跌一成。
大摩有報告講歐元貶值影響絕不少於美元，只要歐元兌美元平價，多隻貨幣難逃一跌。當中韓圜滙價貶值壓力最大，現價計將貶值超過一成，明年底見1,300兌每美元。新台幣亦貶值到36兌每美元；港元兌新台幣由4.2算跌到4.7算。計劃聖誕或出年外遊血拼，越遲唱錢反而有着數。
Martin Lindstrom購物小貼士：
1）銀包盡量放「金牛」，面額越大越唔捨得用；
2）唔好用購物籃/購物車，載得越多買得多；
3）避免同囝囡同行，購物預算有機會超支22%；
4）避免跟伴侶齊購物，購物預算有機會超支19%。
C+B
本欄逢周一刊出