呢排雷神停賽，騎師王局勢變幻莫測，好似剛周三夜賽咁，郭能下半場起孖爆冷封王，這天情況都一直好唔明朗，跑完前六場，最叻嗰個潘頓都只係揸住兩win，領先惟未穩勝騎師王。
田泰安有見及此，第七場四班1400米，嗱嗱臨爆冷贏賀賢馬房之「超凡夢想」起孖，同潘頓睇齊唔蝕章畀佢。「超凡夢想」同第三場頭馬蔡廐「東方快車」，都係雷神停賽換安仔勝出。其中「超凡夢想」與第四場頭馬「發盈喜」一樣，都是今季已三捷。
女馬主蘇凱欣愛駒「超凡夢想」今場末段從大外欄如飛殺上，話過就過，勁到好似飛將軍從天而降咁款，單Win有15倍，組合獨贏開A3派28元；欣欣希望愛駒扶搖直上的夢想成真，可惜她無現身，由爸爸蘇啟聲代拉頭馬。
賽馬經常都會歷史重現，呢場第二名由「一馬當先」在潘頓胯下後上取得，去年同日其士盃日尾場同班同程，正是「超凡夢想」搭「一馬當先」Ｑ，當時派彩86.5元，今次則194.5元。今場三、四名分別由熱門「歡樂一生」及大冷門「勇少爺」後上拎到，四重彩派11萬幾。