恭喜晒，金管局副總裁彭醒棠（Peter）噚日榮升做新老爺，佢喺投資銀行工作嘅寶貝仔Karon噚日與女友Tammy正式拉埋天窗。
Karon與Tammy噚晚喺灣仔君悅酒店擺酒，筵開大約38圍，現場佈置得好有童話故事氣氛。彭醒棠老闆、即係金管局總裁陳德霖（Norman）當然有到賀喇，Norman呢晚打咗條粉紅色領帶，終於唔係佢返工戴開嘅藍色與湖水綠色，斷估佢份人情都唔會細份嘅。
彭醒棠喺金管局工作21年，做到明年2月「登六」退休，人緣極佳，據講好多金管局同事，甚至舊同事都有到，好似已經退休嘅金管局前副總裁蔡耀君、𠵱家做咗財經事務及庫務局副局長嘅劉怡翔（按揭證券前總裁），𠵱家同事就包括金管局候任高級助理總裁李令翔等等，總之就大家一齊替佢老人家高興喇。
聞說，彭醒棠得一粒仔，最大心願相當傳統，就係希望乖仔早日結婚，之後最好三年抱兩，等佢可以弄孫為樂。