上周六舉行嘅NBA常規賽，竟然連續兩場都出現絕殺：先有C約瑟夫（Cory Joseph）射入三分波，幫速龍以84:82反勝巫師；再有「大帝」勒邦占士（LeBron James）幫騎士以90:88險勝網隊，力保主場九戰不敗。
後備上陣嘅C約瑟夫喺比賽剩0.6秒嗰陣，接到迪洛桑（DeMar DeRozan）傳波就毫不猶豫咁起手，射入三分波幫速龍反勝巫師兩分；賽後迪洛桑都忍唔住大讚呢位贏波功臣：「只要比賽未完，我哋就唔會放棄。我一早就知約瑟夫可以喺關鍵時刻入波，佢係個令人信賴嘅隊友。」同日另一場，有兩位囝囝入場支持嘅占士全場攻入26分，仲喺最後1.9秒射入壓哨球幫騎士絕殺網隊。佢賽後講笑話：「我估兩個囝囝都唔會在意我幫球隊贏波，因為佢哋淨係想趕返屋企打機。」
