大埔太和「屋仔」麥當勞分店噚日完成大裝修，重開後唔少網民好傷心，皆因原有嘅藍色屋頂消失，改為普通嘅歐美風四方外牆，有網民直指「昨天是童話小屋，今天變排氣機房」，高呼「還我屋仔頂」，似乎怨氣唔少。
首間分店設育嬰室
麥記就發新聞稿話，呢間分店係麥記全港首間家庭式旗艦店，內有唔少多項家庭元素，包括餐桌採用圓角設計，更係首間設有育嬰室嘅麥當勞。呢間育嬰室裏入面放有梳化椅、換片墊等等，麥記話，每次當顧客用完之後，就會清潔消毒。
而過去嘅露天遊樂場亦都已經翻新，仲會增設5款遊樂設施，逢周二至日每朝10點開放至晚上6點，除公眾假期，周一會停開進行全面消毒及清潔。
連同太和店在內，麥記新增9間分店設有「母乳餵哺優先座」，唔知麥記對媽媽階層咁照顧周到，網民會唔會因此息怒？