NBA歷來最好嘅球隊同埋最衰嘅球隊，都可能喺晒今季常規賽度。勇士繼續狂射狂入，上周五作客出戰太陽，全隊射入破球會紀錄嘅22個三分波，以135:116贏波，將NBA開季連勝紀錄刷新到17場；這邊廂76人一樣到達17場里程碑，但就係衰到貼地，作客火箭輸114:116，平球會最差開季紀錄17戰全敗，跨季連輸第27場，更加係北美體壇最長球隊連敗紀錄。
負火箭跨季連敗27場
76人新秀J奧卡科（Jahlil Okafor）最近遇上涉嫌街頭打人嘅麻煩事，喺今場波都有上陣，但表現平平，12射四中得11分。76人喺第四節發力狂追，但都係敵唔過有射手夏登（James Harden）攻入50分嘅火箭。76人再輸一場之後，0勝17負平咗球會嘅開季最差成績，亦刷新埋北美四大運動嘅最長連敗紀錄，跨季連輸27場。衰嘢陸續有嚟，76人喺周日作客灰熊，再輸嘅話就會追平09/10球季網隊嘅NBA最差開季紀錄。（now678台明日7:00am直播）
76人有條件成為NBA歷來最爛球隊，呢邊勇士就繼續向成為最佳球隊進發，作客太陽以135:116大勝對手，刷新NBA最佳開季成績到17勝。主將史提芬居里（Stephen Curry）只係打咗三節共31分鐘，但已經有41分進賬；勇士全場入22個三分波，又破一個球會紀錄，「弗」到震嘅居里一個人已經入咗九球。