【本報訊】今年8月，一代名伶林家聲辭世，原計劃年底為演藝學院擔任藝術指導、傳承粵劇文化的心願，成了未圓的夢。「人生就係咁無常。」說這話的，是戲劇「教」父毛俊輝。一個是西方戲劇大師，連黃秋生、詹瑞文都要叫他一聲老師；一個是粵劇代表人物，三次獲授勳。陰差陽錯無緣合作，惟有將遺憾化為動力，下月初，毛Sir就帶領演藝師生，踏台板演出戲寶《無情寶劍有情天》，向一代宗師作最後致敬。
記者：呂麗嬋
見面不多卻交淺言深，上年走馬上任成為演藝學院新成立戲曲學院院長，毛俊輝第一時間邀請聲哥義助，哪想到兩周前見面時仍精神奕奕的老人家，一夜間撒手人寰。「聲哥雖一直有病，年紀又唔細，但真係好可惜」。人生如戲，就如當年結婚前一個月，才確診淋巴癌，無常人生，戲劇大師早有領悟，「我𠵱家係冇胃嘅人，經歷過，你就會知，除咗條命，其他都係身外物」。
去年執導《杜老誌》賣個滿堂紅，在美國讀西洋戲劇，毛俊輝的中國戲曲緣，要追溯到豆丁時代。「爸爸係大戲迷，好細個已成日帶我去睇京劇同廣東大戲」。耳濡目染，與文學不可分割的中國戲曲，猶如種子。六十、七十年代，中國爆發文化大革命，美國卻是嬉皮時代，思潮動盪，毛俊輝在當時的浸會學院修畢英國文學，遠赴美國進修戲劇，是當年罕有能夠走進美國白人職業劇團的黃色臉孔。
「只係小劇團，但當年的確好幸運。」27歲已當上藝術總監，其後又獲賞識，踏上百老匯大舞台，一待17年。80年代，香港草擬《中英聯合聲明》，不少人為前途問題移民，他卻回流香港。「嗰時喺紐約，中國著名劇作家曹禺首次訪美，哥倫比亞大學為歡迎佢，綵排全英語劇《北京人》，我係男主角，中西媒體對我都好評，當時我就覺得，外界覺得我演來有味道，其實係源於我嘅身份。」
婚前一月證患淋巴癌
1985年，當年這個連廣東話也忘記得七七八八、滿口「you know」的番書仔，決定回港。「嗰一年，演藝位於灣仔嘅校舍剛落成入伙。」答允出任戲劇學院表演系系主任，走進人生下半場，「我上海出世、香港長大，外國讀書同工作，呢種歷程，其實好香港」。詹瑞文、黃秋生、張達明等無數舞台上下獨當一面的人物，都是他的學生。「喺美國多年，餓咗戲（中國戲曲）好耐，一返嚟忍唔住走咗去學京劇，仲一學8年。」他大笑。
在演藝學院15年，由當年的小毛變了毛Sir，桃李滿門。2001年，熱衷開荒的他毅然辭職，加入正進行公司化的香港話劇團擔任藝術總監，由象牙塔重上前線，除參與改革，還全力創作，拚命三郎沒日沒夜工作，沒一年就倒下，「我最記得係2002年10月3日，同陳冠中喺皇后食飯，食食吓嘢，嘔咗一灘血」。送往急症室後，證實是淋巴癌，且已擴散至胃，「要接受10個月化療，原本諗住11月結婚，結果梗係推遲」。一場大病，2007年功成身退，辭去話劇團工作，原擬與患難與共的太太胡美儀過悠閒生活，但人生走了大圈，又重返演藝學院。
「出任新開嘅戲曲學院院長，其實係臨危受命，我唔敢講可以做到啲乜，只希望好似聲哥一樣，為傳承出一分力」。毛Sir強調，重演戲寶不為創新、打破或改革，而是希望向一代大師致敬。「2007年林先生喺紅館壓軸演出，我永遠唔會忘記，工作人員推住坐喺輪椅嘅佢，全個舞台只有佢一個人，歌聲響起，嗰種味道、嗰種堅持，令整個場館都好震撼，係一代名伶對藝術嘅一生奉獻。」他說。