【本報訊】一幕媽媽推着嬰兒車被拒上巴士，激動之下以BB車阻擋巴士開車的片段，引來熱議，婦女團體指事件本可小事化無，認為媽媽先讓步的話，相信司機和其他乘客會協助她上車，不致將事件鬧大。
「最好係一人讓一步」。鴨脷洲婦女會主席蔡月嬋指，由於該區沒有港鐵，不少媽媽帶BB出街都需乘搭巴士，所以出門要自備孭帶，方便上巴士時一邊抱BB、一邊收起BB車，「咁多年呢區嘅媽媽都係咁做，只要媽媽肯收車，司機會等你，其他人見你狼狽都會幫你，一般都冇問題」。
民主黨婦女政策副發言人陳樹英認為，最好當然由媽媽配合收車規定，但她說：「有啲媽媽可能真係體弱抱唔到BB，如果係咁，巴士公司係咪應該唔好將BB車睇成行李？」她以輕鐵作例子，指如屬繁忙時間或車廂擠迫，車長都會勸喻乘客收起BB車，但其餘時間則不限，「套用落巴士都應該有通融空間，當然呢種酌情要睇情況，包括媽媽狀態同埋交通情況」。
大律師：不構成虐兒
對於事件中母親用BB車來攔阻巴士開車，是否構成虐兒呢？大律師陸偉雄解釋虐兒需從時間及環境來判斷，「如果棄置個BB喺橫風橫雨或危險嘅環境之下，又或者擺喺路邊成一個小時，咁就可能係虐兒」。但觀乎今次情況，媽媽正與人爭執，並非刻意要令兒童受傷害，所以並不構成虐兒。
有網民稱BB車阻攔巴士會構成阻街，陸偉雄說，阻礙行車道比一般街道較嚴重，但判斷是否阻街須按其意圖，「例如有人多次叫佢行開，佢都唔肯，一直阻住行車，又或者阻礙時間好長，不過今次以事件性質嚟睇好小事，即使警員到場，相信都係警告或勸喻了事」。
■記者龔蕙芝