是咁的，話說Uber喺噚日晏晝1點至4點就搞咗個名為「人見人愛、車見車載」嘅蘇施黃（阿蘇）為你提供最安全、可靠同優質嘅服務，邀請阿蘇客串做司機，乘客仲要係完全免費，唔使畀車錢，打正旗號以明星司機嚟做宣傳吸客。
唔知係咪受去年4月阿蘇嘅「茶包」事件，同今年8月喺國泰航空嘅coffee lounge大鬧職員「兩條茂利」嘅事件影響，有網民就留言話阿蘇出名鍾意鬧人，驚畀完錢要俾阿蘇鬧；有網民仲好抵死咁貼咗阿蘇主持嘅旅遊節目《阿蘇出駕》時，佢揸車衝落水大叫過癮嘅cap圖，留言揶揄問：「可唔可以咁揸（車）？」
有啲網民仲講到話會考慮罷搭Uber，Uber嘅fb小編見到咁群情洶湧，即回覆謂多謝網民嘅意見，表示為咗提供更優質嘅服務，佢哋都好歡迎網民提議Uber之後搵乜名人或明星做司機，實行聽取民意。
主角阿蘇就一於少理，佢晏晝喺fb貼相大晒客串Uber司機接客嘅戰績，見佢着住老西，笑晒口咁同啲乘客合照，好似都好專業咁款，當中四單生意入面其中有兩個係男乘客、又有一家三口同埋4朵金花，到達目的地之後，阿蘇仲會送番份小禮物畀乘客，真係服務周到！