營多撈麵（Indomie Mi Goreng）價錢幾蚊一包，對於香港人應該唔會陌生，佢嘅價廉、方便同惹味真係「窮人恩物」。但唔講唔知，印尼經濟係靠營多撈麵撈起。營多撈麵嘅母公司Indofood係印尼最大食品生產商，而印尼係全球第二大即食麵市場，每年消費約134億包即食麵。印尼於2015年嘅即食麵銷售額預計達到32兆4千億盾，比去年同期的27兆2千億盾增長19.11%，而且每年都有上升的趨勢。除咗印尼市場熱賣，營多撈麵在國際市場一樣賣得，全球80個國家如香港、澳洲、中東都有售，所以話印尼經濟靠Indomie撈起。
一包撈麵撈起成個國家經濟可能有啲誇張，但窮小子喺度諗中國經濟又要靠咩先撈番起？十幾年前，中國靠廉價嘅勞工成本成為「世界工廠」，但國家勞動法實施及工資上升，令中國勞工的成本優勢漸漸消失，好多工廠已經搬到其他東南亞國家或者是倒閉收場。據中國海關總署於11月8日發佈的數據顯示，10月以美元計價的中國出口額同比下降6.9%，連續四個月同比下降，反映中國出口不濟，外需疲弱，經濟難有起色。
成日話中國產業要升級同轉型，但係國內製造業不景氣下，中國唔能夠順利升級至第三產業，令經濟動力無以為繼。中國嘅金融服務業被政府過度干預，令金融產品定價唔能夠市場化，金融監管制度及股票市場機制亦不夠完善，如漲跌停板機制令股民欲哭無淚，想沽貨又沽唔到，令市場出現恐慌情緒；國家領導人引以為傲嘅高鐵技術，又因政治問題，唔能夠成功外銷，「一帶一路」似宣傳口號，實際是否能刺激國內經濟存疑；國內聞名嘅科技企業淘寶及騰訊，因企業思想未夠國際化，始終打唔出國際市場，只能活躍於內地市場做「地頭蟲」。
中國經濟基礎難比美國，大陸地大物博但最缺乏嘅係「軟實力」如創新思維、國際視野、企業人才同埋完善嘅法規及制度，即使人行再減多幾次息、降多幾次存款準備金作用都唔會大，因為中國面對嘅問題唔係冇錢做生意，而係有錢都撈唔起盤生意。
印尼經濟靠撈麵撈到風生水起，中國經濟究竟要靠咩先可以撈番起？
窮小子
https://www.facebook.com/poorguyfans.hk/