國際局勢愈嚟愈令人緊張，法國、美國、俄羅斯不斷派戰機轟炸敍利亞境ISIS佔據地，最初係炸軍事設施，現在擴大至轟炸佔據區（或佔領區）內之經濟設施，主要係油田、油井、運油車等等，理由係ISIS以偷石油、走私石油為主力金錢來源，炸之哉就可切斷或大大限制ISIS之現金流，令佢地嘅恐怖分子冇錢在歐洲活動（歐洲生活費、使費都幾貴㗎）。
但轟炸太多，肯定傷及平民，導致大量難民逃亡，湧往歐洲，ISIS分子乘機混入難民群中，混入歐洲搞事，於是歐洲不收留難民，幾違反歐美平時倡議嘅人道、自由、博愛原則，與1960年代嬉皮士運動後之自由派哲學有矛盾，收留難民咯喎，又隨時俾一啲害群之馬乘機木馬屠城，巴黎黑色星期五就係活生生例子。點算好呢？美國國會立即閂門自保，通過法案不收留敍利亞難民，奧巴馬聲言唔會簽署有關法案，一定否決之。但共和黨及民主黨議員聯手之下，有足夠票數可以再否決總統之否決、強行立例，白宮莫奈之何。美國共和黨人控制之20幾個州分又紛紛通過議案，即使聯邦政府容許敍利亞難民入境，州分唔會准難民入嚟居住。到咗星期二（香港時間），美國人權組織ACLU（American Civil Liberties Union）索性入稟法院，控告印第安納州州長不准敍利亞難民進入印第安納州（呢類訴訟相等於香港之司法覆核）。然後又發生土耳其擊落俄羅斯戰機事件，令俄羅斯與土耳其關係急劇惡化。
難民問題搞到歐美天翻地覆，立立亂，實在係人間悲劇，已到了有理說不清，情緒理智糾纏嘅階段。最慘嘅就係聯合國難民公署（UNHCR）人員做到氣咳，既唔夠人，又唔夠錢，各國政府爭論不休之時，難民公署還是要照顧野外難民。不少歐美公司講CSR（企業社會責任）唔係做公關，而係真係出錢援助，Google、高盛、Zara、H&M、福士汽車、Ericsson、Brown-Forman等紛紛捐錢俾難民公署，最落力嘅就係宜家（Ikea），自2010年至今，已捐咗一億六千六百萬美元，剛剛宣佈推行一個新捐款計劃，就係每賣出一件LED產品，就捐出一歐元俾難民公署，為期三個星期，於40個國家地區舉行，叫做Brighter Lives for Refugees，去年呢個計劃就籌集到一千一百六十萬美元，難民公署真係要千多萬謝。各位如果要盡一分力，有需要買LED產品時，可以諗吓。