上周中，食飽飯嘅一晚，未凍，沙田河畔；一班久未齊集嘅講波男女，忽然浮晒出水，因為有朋自遠方來，黑夜鬥波。
今場對住過江龍台灣黑熊明星隊，未知對方實力有幾勁，所以擺好個後防先穩陣啲：鐵三角一個「Now」字，柏案驚奇守龍門，拍住大哥瑜嘅中堅係榮基，不過睇住佢兩位好靜咁企埋一齊，係有啲唔慣。
可能之前柏霖主席吹雞召喚隊友時亂打告急牌，幾位中場星級師兄弟紛紛蒲頭，司徒防守、阿迪策劃、和哥打骰，場邊口痕友見到咁嘅陣容，忍唔住嗌咗幾句「WE ARE HONG KONG」，結果引來對手臨開波前都齊心合力叫咗幾聲「台灣渣油」！其實我哋隊波有好多台灣卧底，個個都恨不得聽日就搬過去住，不過今日各為其主箒。講番場波，各位師兄弟毫無保留，德能兄左上右落、丹尼爾跑爆油缸、潘生邊踢邊講，何輝更為足球犧牲除帽上陣，結果頭頂腳踢入咗兩球，差啲大演帽子戲法；不過最令對手招架唔到嘅，其實係幾位港女！
對方本身有識波嘅台妹壓陣，腳法一流，但風頭就遠遠不及我哋呢邊四大港女：阿凱主力負責揸機；GiGi唔着球證衫即刻生晒全場跑動，不過越位次數多過掂到個波；依雯籃球鞋上陣就係博對手輕敵，果然俾佢用美色呃到黑熊隊波企晒喺度任佢起腳，射波次數拍得住大哥瑜過半場次數。細細粒嘅車車就改變咗成場波嘅氣氛，由靜雞雞變咗嘻哈哈，啲高分貝嘅聲浪全部嚟自佢把口，一時間打窒咗文靜台灣朋友嘅節奏，香港地本來就應該係咁熱鬧嘅。
可能為咗避免俾街坊投訴噪音，我哋場波一完，球場就熄燈；不過摸黑之下，後面嘅沙田畫舫顯得更迷人，啱晒台妹、港女selfie！
KEYMAN
節目主持