莫雷拉今戰(29日)停賽，除了田泰安獲蔡約翰支持而受惠外，潘頓亦接手唔少莫雷拉座騎，其中「發盈喜」及「通勝」上仗在莫雷拉胯下贏馬及跑第五，潘頓冷手執個熱煎埋，有得食唔食，當然罪大惡極啦！
事實上，翻查上季莫雷拉因停賽缺陣期間，潘頓共接手五匹剛配雷神上陣之馬匹，並交出兩冠兩亞一殿之佳績，信數據的話，「發盈喜」及「通勝」應穩入前列。
第四場三班1200米的「發盈喜」今季兩出兩捷，表現大幅進步，上仗更以收韁姿態輕鬆大勝對手，並且輕鬆造出1分09秒15，總時間比起當日三班頭馬「太陽喜喜」仲要快逾半秒，難怪該役蹄下敗將「再開心」及「閃耀鑽皇」再出已贏馬補中，可見水準甚高。「發盈喜」今仗初上三班，仍難以構成阻力，埋門更刻意由潘頓試課大閘摸準性能，求連捷之心非常明顯。
至於第一場五班1600米的「通勝」，今季三戰均跑入前五名未失獎金，愛爾蘭自購馬已漸適應水土，改由方廐愛將潘頓接手，當然以贏馬開齋為目標。