一連三場的「男人幫演唱會2015」前晚在紅館開鑼，任賢齊、蘇永康、梁漢文（Edmond）和黃家強在台上賣力獻唱，四個男人的太太均有到場支持。
家強有感而發
四子以主題曲《男人幫》揭開序幕，蘇永康和梁漢文原本是Big4成員，如今過檔男人幫，即傳與張衞健及許志安不和，蘇永康笑說：「打麻將都冇話廿年同一隻腳，光頭嗰個（張衞健）仲話我哋牆頭草！」Edmond自認：「我哋係呀！」未能重組Beyond的家強有感而發：「有啲難度，夾band要夾人，唔好怕蝕底，最緊要一條心。」之後四子輪流獨唱自己經典歌，家強邊跳邊唱時，一度緊張得忘了拿咪獻唱。獲全家人撐場的小齊唱《心太軟》時掀起全場合唱，他high爆走去台邊咀老婆，囝囝囡囡遞上薯片，但小齊要唱歌不敢吃，十分搞笑。
要李宗盛作歌
表演嘉賓李宗盛被讚廣東話好過小齊，小齊即拿李宗盛舊愛林憶蓮開玩笑：「大哥好鍾意香港美食，連囡囡都係香港製造！人哋話要學嗰度語言，最好都係識番個女朋友。」李宗盛尷尬說：「太久未用，渣咗！」四子還希望李宗盛能為他們作歌，蘇永康說：「大哥做過趙傳同楊宗緯，歌聲我唔比較，但講樣我唔輸蝕㗎！」尾段他們逐一發表感言，最後四子合唱《海闊天空》，在現場手機點點燈光下結束演唱會。
完騷後，小齊被指台邊咀老婆好高調，他笑說：「唔通錫家強老婆咩？」家強說：「你試吓，因住我老婆鍾意咗你！」Edmond爆草蜢想撬家強過組，問家強是否對男子合作改觀？他說：「點可能永遠唔變，但男人幫畀到我安全感。」提到葉世榮曾指家強和黃貫中嗌交好失禮，家強說：「佢（世榮）喺我成長中好似哥哥咁照顧我，但好多嘢唔係我可以掌握，我從來冇鬧過佢（Paul），係俾人鬧之嘛。」
採訪：張俊銘
攝影：陳志嵐