張家輝自導自演的電影《陀地驅魔人》集驚慄、人性、愛情於一身，更找來圈中老友客串，如張學友、林嘉欣、余文樂、劉偉強、吳啟華、謝雪心等，碌盡人情卡，而家輝更在戲中再度獻唱，獲得一致好評，難怪家輝笑謂：「我係歌手，都叱咤過㗎！」
撰文：黃曉妍
張家輝透露構思《陀地驅魔人》源於數年前看到網上流傳一條短片，片中男士以粗聲粗氣為鬼上身的女士驅鬼，他說：「呢個男人有宗教背景，但我部戲就撇除晒，唔要宗教背景，驅鬼方法都係源出於民間方式。」提到家輝在後巷向鬼派糖一幕，所有鬼有不同爛面造型，環境亦營造恐怖氣氛？家輝說：「嗰場戲嘅氣氛、設計，美術總監奚仲文幫助好大。首先我唔係賣驚嚇，我亦都唔可以唔滿足因為呢樣嘢而入場嘅觀眾，所以我個人會側重一場女記者（蔡思貝飾演）去我屋企見到女鬼（郭采潔飾演）嗰場戲。」
笠膠袋搵真相
如果你認為《陀》片只是一部驚慄片，那你就錯了，此片更着重於人性、因果方面，因一隻鬼的怨氣不散，而要驅魔人扮死進入鬼域空間找答案，當時家輝在片中笠膠袋扮死，他說：「因為要接近死亡先可以進入到嗰個空間，如果我有宗教信仰就可以燒道符，然後急急如律令咁就可以去到嗰度，但我冇宗教，唔通我要跳樓先去到，所以我就諗到笠膠袋。」家輝指整部戲有四個字作總結，就是「有口難言」，他說：「我由構思至所有工序完成，我冇辦法確確實實話畀大家知我想拍乜嘢，因為呢部戲太需要調色、特效、ＣＧ、音樂配合，是但一樣嘢未完成，都唔係我想畀觀眾睇到嘅，更加話唔到俾人聽。」
最驚喜是張學友於末段客串，但只是一個鏡頭而已，是否下集的伏線？家輝坦言沒有刻意鋪排下集，更沒有這個野心，他說：「我想有一個效果，一個神秘人嘅出現，你唔知佢做乜嘢，又唔知點解喺度，但係又要令你印象深刻，其實故事冇話完唔完，因為我個角色不斷有個案發生。」
對於自己在戲中唱《你是我心愛的姑娘》獲網友like爆，家輝話：「原本我揀定首英文歌，點知個歌手鬼咁藝術家，唔肯賣出嚟做電影原聲大碟，冇法啦，又揀過第二首英文歌，點知仲衰，搵唔到間唱片公司，但係總要有定案，我亦冇時間再去搵，咁啱有個朋友畀呢首歌我聽，歌詞又好貼切，當然有諗過搵我阿哥（張學友）唱，但係播歌嗰段戲完咗就輪到佢（張學友）出現，我驚觀眾會混淆，最後變咗我唱，我係歌手，都叱咤過㗎。」
尾段表白催淚
其實《陀》片不乏感情位，家輝與郭采潔一段人鬼感情，究竟是否存在着愛情？尾段家輝向郭采潔一段催淚對白揭露了一切：「你成日問我，你喺我生命裏面重唔重要？我答唔重要，係因為你比我條命更重要……你最蠢嘅就係問我鍾唔鍾意你？我仲點會鍾意你啫，因為我愛你。」
家輝笑說：「其實冇乜人識欣賞，唔交代嘅原因係大家都知道（人同鬼）唔得，但係唔提表唔表達到？你又知佢又知唔得，但感情係存在，呢樣嘢係最令呢兩個人難堪。」
化妝：Midco Chu
髮型：Jeff Wu
