練馬師蘇偉賢鎮倉寶，女馬主譚毓楨的愛駒「精彩鬥士」係一匹充滿戲劇性嘅馬，上季一出在巫斯義胯下未盡全力，只係得第五，搞到巫斯義一身蟻，被罰停賽十五個賽馬日。隻馬再出換雷神即刻建功大平反，強如「詠彩繽紛」亦唔係佢手腳。接住「精彩鬥士」喺香港經典盃片出片入，影相輸條線僅敗。到咗打吡大賽，就因直路嚴重受阻，大熱門影都冇。總共在港四戰，每一仗都有話題性。
不過，「精彩鬥士」自打吡大賽後，完全靜咗落嚟，已久休八個半月，直至嚟緊嘅周日（29日）第八場一班1600米其士盃先至復出，勢成為焦點所在。
蘇偉賢解釋，原來「精彩鬥士」打吡後蹄甲曾有少少問題，故此提早歇暑，今季7月底復課，本來進度良好，點知9月下旬左右，踩中粒石仔，令蹄甲瘀腫，為了謹慎起見，於是停操約兩周，等佢完全康復，再循序漸進做工夫。
對於「精彩鬥士」目前嘅狀態，蘇偉賢表示好滿意，本月中由潘頓操刀試大閘得第二，僅輸畀高班短途馬「萬事勇」，走勢好理想，雖然「精彩鬥士」只係季內初出，但整體比上季更強壯成熟，亦已有作戰水準，所以對佢有一定期望喎。