練馬師米高哥鄭俊偉，近來除了心繫旗下鎮倉寶「好好計」嘅進度，希望可以喺下月1200米香港短途錦標有好表現外，佢喺今個周日（29日）沙田日馬，亦有一個重要任務，就係不可再令鄺美雲失望了。
米高哥解釋，上次佢刻意部署Cally鄺美雲愛駒「甜蜜鑽石」在本月8日婦女銀袋日上陣搏殺，由於知道鄺美雲事務繁忙，於是特意提早三個禮拜通知對方，希望鄺美雲可以抽時間入場。婦女銀袋日當天，Cally搭乘早機從西安十時抵達香港，匆匆忙忙化個靚粧，一身高貴黑衫黑帽打扮，趕喺頭場開跑前現身，怎料「甜蜜鑽石」在亮相圈煩躁不安，離開亮相圈後但進入跑道前大力碰撞欄杆，抵達起步點後證實左前腿不良於行退出，當時鄺美雲睇到冇晒表情，非常失望。
米高哥話Cally是知名人士，好多人識佢，「甜蜜鑽石」咁樣搞一搞，令佢白走一趟，真是非常不好意思。米高哥自揭當日向鄺美雲解釋情況時，感到自己塊面前所未有咁紅，因為場面實在太尷尬。
不過米高哥話好在「甜蜜鑽石」只係小傷，好快喺本月13日試閘第一，走勢甚佳，狀態有進冇退，周日跑1600米幸運地抽一檔，形勢有利。米高哥仲話賽前特意找韋達傾傾，拜託對方要加加油，小心發揮「甜蜜鑽石」，希望隻馬可以打開勝門，唔好再令鄺美雲失望。