意大利前鋒巴洛迪利俾人戲稱「巴神」，皆因佢球場內外都有大把瘀事，經典作係2012年歐國盃決賽周意軍對西班牙，巴神單刀但遲遲唔起腳，搞到俾對手封阻。利物浦門將米洛列特唔知係咪跟得呢位舊隊友多，周四歐霸盃B組分組賽主場對波爾多嗰陣，持球超過21秒「思考人生」，結果被罰間接自由球令球隊先失守；好彩隊友占士米拿同賓迪基幫到手，紅軍反勝2:1，米洛列特先唔使做罪人咋。
反勝波爾多歐霸出線
比利時門將米洛列特真係令利迷又愛又恨，冇錯佢不時神救，但同時又不斷派膠，周四佢就巴神上身嘞。話說30分鐘波爾多失咗控球權，米洛列特就喺自己禁區內接住個波，見佢行吓左、行吓右，指手劃腳叫隊友走位，係都唔踢走個波；有網站幫米洛列特計過，佢足足用咗21秒都唔開波，比球例要求六秒開波多成兩倍幾，球證真係唔吹佢拉布都唔得。波爾多喺禁區內獲得間接自由球後，就由沙維特接應隊友柏拉斯橫傳勁射入網，幫波爾多先開紀錄。
高路普記者會抽到乾
好彩米洛列特唔使做輸波罪人，紅軍靠占士米拿射入12碼同賓迪基建功，半場已經反超前，最終小勝2:1，以兩勝三和喺B組提早出線。紅軍領隊高路普出名風趣，賽後記者會都抽米洛列特水，話說當時一班記者輪流不絕係咁問問題，紅軍新聞官又冇阻止，高路普就笑住對新聞官講：「你點解等咁耐，你等嘅時間仲長過米洛列特喎。」引起哄堂大笑。不過點都好，紅軍反勝出線，高路普都好開心，讚球員冇因為事件影響心態。
紅軍順風順水，但前鋒史杜列治就問題多多；佢原本準備對波爾多復出，但賽前又傷過，高路普都話唔知幾時先可以派佢上陣。