胡杏兒將會於下月28日與未婚夫李乘德（Philip）於香港拉埋天窗，本在天津開工的她昨日專程回港出席嫁喜餅活動搵真銀，並於活動後辦過大禮事宜。大會為杏兒出嫁大搞意頭，送上「祝李杏福」的嫁女餅，戴上巨鑽戒的她冧爆表示：「呢個係佢（Philip）嘅意見，我哋事先講明籌備婚事，點樣都要開心。」之後更以夫家的客家話講老爺奶奶。
與Bosco合照尷尬
活動上，杏兒被擺上枱，要分配鄭嘉穎、馬國明、吳鎮宇、李思捷等合作拍檔及舊愛黃宗澤（Bosco）在婚禮的遊戲角色，她最後揀Bosco做大妗姐，更被司儀要求與Bosco相片合照，杏兒即顯尷尬拒絕，訪問時她表示：「我睇稿睇唔到，有啲尷尬，不過大家都係好朋友，佢有send訊息祝福我，仲話得閒就到。」
杏兒透露婚禮有禮餅及婚紗贊助，活動過後就去忙過大禮，她表示：「之後會過大禮，今晚返天津開工。」問到婚禮進度，她表示：「𠵱家籌備到七七八八進入直路，有好多瑣碎嘢要安排，自己瘦咗五磅，希望快啲安排完成婚禮，但係又唔想，如果完咗婚禮好失落，因為婚禮只係得一日，我之後放假休息少少。」之前，Philip趁她返內地開工夜蒲媾女，杏兒表示：「其實嗰兩位女仔我都識得，出得街都預咗有呢啲事，我唔會叫佢唔去呢啲地方，佢自己有朋友、 有佢嘅圈子，叫佢唔去係唔正確嘅做法，我唔會介意，對佢百分百有信心，今次係小插曲。」
採訪：卓寶花
攝影：仇志德