【長沙灣】
徐小鳳其中一首金曲《喜氣洋洋》最近再度翻熱，有賴剛剛過去嘅區議會選舉，選民投票意欲高漲，代表民建聯重量級區議員鍾樹根及葛珮帆齊齊被踢走。一班熱血網民為咗慶祝成功將Tree Gun「連Gun拔起」同埋真心道別葛博士，專登點唱小鳳姐呢首好歌《喜氣洋洋》獻俾鍾樹根同葛珮帆，可以想像一邊「斬葛除根」，一邊熱烈地彈琴熱烈地唱，場面相當壯觀。
急推友人上車
前晚小鳳姐同幾個朋友去長沙灣D2 Place大公館用膳，一食就食到午夜12點。小鳳姐走嘅時候見到記者守候，表情愕然，但仲幾好笑容，有揮手打招呼，記者問：「小鳳姐，可唔可以問兩句呢？」小鳳姐就好有禮貌咁話：「問啦問啦。」
不過，當記者問小鳳姐：「識唔識鍾樹根？」時，佢聞言色變，即刻擰晒頭，上次小鳳姐撞到呂秉權，被問到網民用《喜氣洋洋》賀鍾樹根連根拔起，佢仲話希望被播歌嘅人唔好嬲咗佢。今次記者再次提起Tree Gun，小鳳姐就顯得煞有介事，仲耍手擰頭轉身同身邊嘅朋友講：「你哋行先，行快啲啦，你哋行快啲啦，快啲上車啦。」然後，一邊推友人上車一邊話：「我唔喺香港，我都唔係好清楚呢啲事。」講完就急急腳上車離開。
採訪、攝影：黃曉程、梁繼光
話你知：獲獎主廚專玩fusion菜
小鳳姐前晚幫襯嘅「大公館」，係間採用會員制嘅中菜館，一次過企業會員入會費為$18,888，私人會員$6,888，另月費分$600及$300，但菜館亦歡迎非會員幫襯。掌店嘅主廚陳偉庭師傅屢獲中菜烹飪大獎，佢嘅菜式以新派fusion為主，招牌菜有「清香柚子凍鮑魚」等。
