黃埔東喺區選結束後，抽水戰日日新鮮幕幕高潮。
日前有博客撰寫「潮文」，描寫該區有女選民阻止老公投票畀青年新政游蕙禎，潮文喺網絡瘋傳，惹來勝選嘅經民聯梁美芬喺報章撰文反擊，批評博客出言侮辱，人身攻擊。
梁美芬喺文中點名批評博客葉一知喺《因為游蕙禎，我背叛了太太》一文，多番向佢作人身攻擊，嘲笑投票畀佢嘅男選民都係怕老婆，而投票畀佢嘅女選民則係妒忌游蕙禎美貌，梁美芬認為作者唔尊重選舉結果。
梁又指勝選後，有電召客貨車公司借題發揮話要喺黃埔東局部加價，又稱有為佢站台嘅長者喺屋苑內被欺凌。
佢強調呢區居民好多專業人士，教育水平高，絕對唔係用美色收買到，一定要用政績、靠實力，如果將選舉當成選美，係侮辱咗所有女性候選人同選民。