大快活（052）主席羅開揚都幾可愛，話說羅生噚日主持中期業績會，一開波，佢就話「吖，我哋內地業務有盈利，同店銷售都有增長」，話音未落，旁邊公關就提水，提佢咪咁興奮，要講投資者較關心嘅本港業務先，羅生即刻醒水，尷尬笑一笑幫自己兜咗一句，隨即講番香港業務表現。
羅開揚咁開心都可以理解嘅，大快活嘅內地業務蝕足兩年，今年上半年度終於轉虧為盈，叫做對得住小股東，難怪佢如此急不及待要話畀大家知道。
其實行政總裁陳志成喺2013年度中期業績會都講過，喺內地開嘅大快活，部份真係揀錯位置，所以連續閂咗唔少分店，𠵱家內地只得11間分店。不過羅生噚日話，嚟緊會揀番喺中上屋苑附近開店，計劃每年開2至3間分店，對內地業務仍然有團火。