【中環】六嬸方逸華自從賣咗無綫之後，無綫似乎急轉直下，收益大減，製作又馬虎，已經冇以前咁德高望重，退下火線嘅六嬸，得閒就去行街買衫去旅行，真係優哉游哉。
前晚六嬸突然現身中環，未知佢係咪想收風獻計，順便同8位舊臣子李寶安、梁乃鵬、何小慧、區偉林、鄭善強、陳樹鴻、謝偉光及「花哥」袁志偉敍舊，佢哋一班人約咗去中環九如坊食飯，眾人言談甚歡，一邊傾一邊食，但係突然間六嬸發言，好似「訓示」咁，一班高層個個坐到直晒咁聽，不時點吓頭。
鞠躬講拜拜
食完飯，一班無綫高層逐一離開餐廳，六嬸梗係壓軸出場啦，由何小慧攙扶最後一個步出，但係現場發現六嬸手中竟然有一個「水泡」，係游水用嘅「水泡」，仲要同六嬸外套係襯晒色，一班高層都齊聲叫六嬸「小心」，然後鞠躬講再見，就喺呢個時候，六嬸見到記者影相，喺佢一聲令下，高層一字排開，全部企定定畀記者影大合照，仲話：「佢哋要寫個story，不如我哋畀佢影張相。」之後班高層就和應：「好呀好呀！」
目送六嬸走
而六嬸就將手中水泡和手袋交畀司機，再企喺中間影相，影完後好有禮貌咁話：「唔該晒，辛苦晒！」一班高層一邊祝六嬸身體健康，然後目送佢安全上車就閃人，其間有人話：「道（車）門未閂好。」跟住就又有人話：「電門嚟㗎！」呢班人對六嬸不知幾咁細心！
採訪、攝影：梁繼光、黃曉程