噚日「金融評估師學會」成立，長遠希望成為好似會計師公會之類嘅專業團體，為金融評估行業設立規管框架。創會成員來自評估、審計等等範疇，其中羅馬集團（8072）佔最多，創會會長余季華（Ken）亦係羅馬執董。
Ken都承認𠵱家行業冇監管，估值可以差天共地，「冇人處理，靠個核數師睇住」，所以班行家就聚埋成立呢個學會，前後搞咗差不多兩年。
噚日成立典禮酒會，現場約有70人到賀，仲有位財金圈稀客主禮，佢就係立法會主席曾鈺成。聽聞因為曾主席係第一位回覆大會可以出席，所以見到Ken都隆而重之咁歡迎曾主席。聽聞證監會都有代表到場，但Ken話，證監會只係靜觀其變，暫時唔會參與制訂個監管框架喎。