有人眾籌創業，有人為一己理想開通訊社；June同Jeffery就為視障人士提供就業機會。兩人喺本地眾籌平台FringeBacker集資，想成立樓上咖啡店Café des Lebens，僱用視障人士沖調拉花咖啡，目標籌60萬元，「我哋要求好卑微」，但依家只達8%，尚餘44日，達標路仲未明朗。
80後嘅June有唔少視障朋友，各有才能但無人請，「就算有，都係用我畀個機會你嘅心態」，無法獲得合理薪酬。佢哋想開嘅視障人士咖啡店，員工有一半係以市價聘請嘅視障者，地點最好係鬧市樓上舖。
70年代出生嘅Jeffery，做過跨國公司，唔滿意大公司賺到盡，遂投身自由工作，幫企業做人才培訓同心理輔導。佢話眾籌資金只用於早期租金、裝修同薪酬，除咗賣咖啡，佢仲會喺店內開班，收入全補貼店舖開支，星期四就免費為低收入人士提供輔導，「錢夠用就得，唔係人人都要做李嘉誠」。