蘇麗珊憑《哪一天我們會飛》入圍剛舉行的金馬獎「最佳新演員」獎，可惜敗給台灣演員李鴻其手上，不過蘇麗珊已獲益良多，並名利雙收，《飛》片後工作接踵而至。
曾不滿推戲
金馬之旅後，蘇麗珊首個工作就是夥拍糖妹黃山怡為護膚品牌Garnier拍攝微電影，蘇麗珊說：「微電影主題係塞翁失馬，好多嘢都好似呢套微電影咁，拍《哪一天我們會飛》之前，其實有其他電影想搵我拍，但公司因為同我形象唔啱就幫我推咗，當時我就好唔開心，我話點解要幫我推，我想試呀，但原來之後有個咁寶貴嘅機會，所以我覺得都係一次塞翁失馬。」
談到未來動向，平面模特兒出身的蘇麗珊說：「想多啲拍戲，想向住呢個方向行，自己又唔係5呎8，同埋幾享受拍戲呢件事。」她坦言金馬獎後感受特別深：「非常之大開眼界，太多太犀利嘅前輩，我睇咗《聶隱娘》，不過其他人覺得文言文，睇唔明，但我好鍾意，見到咁多勁人，我好想努力更加進步，坐喺度覺得自己好唔夠！」
糖妹嫌前度
品牌代言人糖妹則表示要修身和養生，保持最佳狀態，等待熟男出現。對於前男友何浩文帶「高版糖妹」遊台灣，被揭疑做第三者，她說：「我覺得自己睇番𠵱家呢個歲數，睇番所有事情，都會覺得我哋𠵱家仲係細，所以我覺得呢啲新聞要發生就發生咗佢喇，將來大個睇番就會話有件咁嘅事！」
糖妹更希望大家以後不要再提起她跟何浩文的戀情，她笑說：「唔該唔好再提喇，唔關我事，我個表入面得一個人，陰功豬！我要努力啲，喺成績表攞多幾隻豬仔先得。」
採訪：楊潔雯
攝影：陳順禎