區議會選舉後碰到資深公關M，佢在大機構做企業傳訊，負責公共事務，即係專門注意政府政策，與政府部門聯絡，與區議會打關係。呢類事情，在美國係「游說公司」（lobbying firm）做顧問代勞嘅，美國啲說客lobbyist係一門專業，多數係律師出身，公關出身，而最好係做過政府官員，對政府行政及公共政策決策過程夠熟悉嘅，呢啲人日日同國會議員及政府部門打交道，樹上隻雀仔都可以呃落嚟，香港環境不同，冇呢類專才，大企業大機構最多只能有一個公共事務部，與立法會議員及區議員溝通。
區議員無甚權力，點解要溝通？公關M話：「做慣商界公關就唔駛睬區議員啦，但一涉及地區事務，譬如基建、巴士路線，在地區推動大型建設計劃，甚至起樓，政府有關部門好怕事，總係要當事人機構自己去同區議會解釋，解畫，務求區議會唔好反對，一旦反對嘅話，有關部門就會同我地機構詐晒型，話我地缺乏諮詢，冇民意支持，講得兩講，就突然唔批准我地嘅計劃，直至我地講掂區議會為止。所以咯喎，區議員無權講yes，但有膽說不，分分鐘令我地企業損失幾百萬元以至幾千萬元嘅時間成本。」
唔怪得公關M有時在酒會見到區議員，就一味陪笑，讚對方幾句，一啲大機構有錢請人，甚至要將區議員分區聯絡，設立甚麼「區主任」或者更好聽啲，叫做「區域總監」，專門同某三四區嘅區議員聯絡，做其所謂銀行RM（Relationship Manager）嘅工作。
如此說來，區議會都幾肯製造新的就業機會，令公關Ｍ不時請人，跑過政治新聞兩三年嘅記者，最啱做呢啲職位。公關Ｍ話：「唉吔，冇咗馮檢基，何俊仁，葛珮帆及鍾樹根呢四個議員，都幾煩㗎，除咗何君堯我地熟悉之外，其餘三位新人，我地完全唔識，15位新民主同盟區議員，我只識得范國威，傘兵區議員又係唔識，要從頭建立關係，都有啲難度，選舉之後，我個部門連我一共四人，相信要忙足一兩個星期嚟update資料庫。」區議員薪水不高，權力好小，但在區議會有個平台發聲批評政府及企業，咁就足以令私人大企業頭痛，此乃香港特殊政治現象，不過正因為如此，公關人員反而有工做！