男人三十而立，但現今香港女性未到三十為中女，三十過後未婚未談戀愛，無論你有多吸引，都自動掛上剩女、末女等稱號。被標籤為剩女的卓韻芝是圈中佼佼姐，鼓勵剩女撇開「賣剩蔗」三字，但歲月不饒人，隨着好友相繼出嫁，從前的中女萬歲終有所動搖，阿芝的一顆恨嫁的心，已準備好遇到真命天子隨時閃婚。
採訪：卓寶花
大情大性的卓韻芝為人樂觀、持開放態度，一向敢言兼言詞鋒利，為女性不明文規定平反，更會大膽講性經以示男女平等，早年透過talk騷講性，但通通都稱為朋友個案，而阿芝將於下月5和6日在灣仔伊館開騷「你個樣好單身」，她說：「同之前啲騷勁大分別，之前講個人好硬淨，又講啲好尖銳、受爭議嘅話題，之後到『床上哈哈笑』開始講性經同男女之間，今次個騷第一次承認我真身，就係你個樣好單身，我諗人大咗冇去蒲，又冇好極端，你哋見我眼下兩粒點都冇咗就知啦，所以慢慢個人會着地生活。」
搵婚姻中介幫手
最初令阿芝萌起主題念頭是見到朋友經歷，她說：「有一日見到個中女好朋友，孭住個大袋，袋內好多雜物，好忙咁拎住本《秘密花園》，我同朋友都好擔心，咁就有咗呢個騷名。」擔心之餘，阿芝也dry足幾年，潛意識強烈反映想拍拖，她牽強地說：「我諗單身都可以話開心，但心裏都會想解決呢個問題，例如我一人唔可以打邊爐，開支紅酒又飲唔晒，有小組織係好啲，乜都可以share，仲有的士錢呢，幾好。」
阿芝早年與樂隊Mr.成員譚傑明（MJ）分手後，曾跟外籍男傳出緋聞，不愁寂寞，卻仍未脫離剩女行列，她指身邊好多朋友仍然單身，並舉例說：「有次見到周麗淇都有問佢，我同佢都單身，唔知點，但聽到王菀之結婚都好戥佢開心。」不少女性擔心婚途，轉搵中介公司找對象，原來阿芝都打探過，她說：「勁專業介紹又保密嗰啲好貴，要畀十幾萬先可以介紹，如果成功結婚，禮金又要分一啲畀佢哋，聽完都係決定等吓先。」但阿芝會接受閃婚，她說：「我唔迷信要拍好耐先結，啱就結，不過自己冇遇到。」
冇人要≠賣剩蔗
眾多女性都不想向現實低頭，更不願被標籤剩女，阿芝卻從不介意，更鼓勵大家：「最緊要單身人唔好歧視自己，唔好覺得自己唔掂，冇人同自己一齊係咪冇人要等於賣剩蔗呢？如本身咁睇自己更加變成蔗，值得畀番自信自己，呢個年代結婚遲、離婚快，生B限期又可以遲，所以唔使太心急。」
事實雖然如此，但阿芝的家人經常催促她，尤其是婆婆，阿芝說：「我個樣好單身，佢個樣好擔心，阿婆日日問，食食吓蝦餃都會話一粒你、一粒你老公咪好囉，喺老人家心目中，啲孫搵到另一半生活美滿，自己先安樂，功德圓滿。我出陣街佢問係咪男仔，當佢知道我同邊個去，佢會話『又係基嘅！』」
場地揚供：Red Mr.
剩女生活做乜好
無論單身、已婚、失婚，只要人生活得精采就稱心，除了工作以外，可以多參與群體活動，擴闊生活圈子，阿芝說：「都巿人單身生活好繁忙，好似我同啲朋友咁，又要一齊學泰拳、學瑜伽、去旅行等等，好多嘢玩，成班單身人士相生相剋，經常互約，而我感受最大單身人士係好團結組織，以前成日話宅男宅女䁥喺屋企冇嘢做，𠵱家單身反而有生活品味，年代唔同，平時可以去下品酒、畫廊、玩潛水、行山、整皮袋仔、整Cup cake呢啲小組活動。」
