前政務司司長唐英年2012年參選特首時爆出「地下唐宮」，僭建加上感情缺失令佢墮馬做唔成特首，同時要花錢填平地下王宮，工程之浩大，近乎重建。三年過後，重建工程差不多完成嘞。
負責改造「唐宮」嘅年輕建築師陳維正同施琪珊，接受《信報》訪問透露唐太郭妤淺話要有隨意feel，而予人形象疏爽嘅唐唐其實係精明消費者，唔係吓吓要用意大利料，花園水牆同地板都係用國貨，最緊要質素好唔好、值唔值喎！
當年傳媒以吊雞車包圍唐宮嘅盛況蔚為奇觀，有傳媒仲影到有隻狗喺唐家兩間大屋之間穿梭，重建之後，狗狗仲有冇機會四圍走？答案係有㗎。八方問過唐唐發言人，翻新之後，兩屋之間造咗條玻璃室內橋，以後行嚟行去都唔怕日曬雨淋。
陳維正同施琪珊係中大建築系畢業，之後去咗瑞士闖天下，唐唐為咗傾呢個project，甚至出錢請兩人飛到巴黎商談大屋翻新大計，又一齊去睇著名建築師Le Corbusier（柯比意）作品，之後正式拍板，難怪兩人都話「好enjoy」。