香港足球登上國際舞台，效力傑志嘅巴倫古素被亞洲足協選中，入圍今年度亞洲最佳外援嘅最後三強，同廣州恒大嘅列卡度高拉特、阿爾阿里嘅前巴甲足球先生艾華頓列比路並列！
噚日亞洲足協公佈年度頒獎禮多個獎項嘅最後三強，最令我求大俠驚喜嘅係，竟然見到巴倫古素上榜，有份角逐最佳外援。呢位34歲嘅西班牙中鋒兩年前嚟香港搵食，效力傑志，幫球會連續兩年稱霸聯賽。巴倫古素喺港超聯真係超晒班，上季喺所有本土賽事射入26球咁多，仲多過港超神射手基奧雲尼。除咗喺香港威，巴倫古素出到去踢亞協盃一樣勁，幫傑志打入今屆八強，佢就射入五球，排射手榜嘅第四位。巴倫古素話：「我完全冇諗過可以入圍，我覺得好開心同埋光榮。如果最後獲獎，將會係我喺傑志同人生之中最美妙嘅時刻。」
硬撼恒大高拉特
另外兩位候選人來頭好勁㗎，高拉特係恒大贏亞冠盃嘅第一大功臣，佢亦係今屆亞冠盃神射手，至於艾華頓列比路就係亞冠盃亞軍阿爾阿里嘅中場核心，嚟亞洲搵食之前，贏過巴甲足球先生；同埋呢兩位巴西球員都曾經入過國家隊。就咁睇牌面，巴倫古素想為香港聯賽創紀錄得獎嘅可能唔大，但我求大俠覺得，能夠入圍最後三強，已經係巴倫古素同埋香港足球嘅光榮。
港足總入圍最佳發展成員
除咗最佳外援，香港足總都候選最佳發展成員，同越南足協、塔吉克足協競逐呢個獎。足總行政總裁薛基輔聽到呢個消息當然好高興，佢話個半月前，足總交過一份40頁嘅報告畀亞洲足協，講吓足總嘅發展同工作；如果最後真係攞到獎，會係亞洲足協對足總嘅肯定。
至於外界最關心嘅大獎亞洲足球先生，就會由恒大兼國足隊長鄭智、阿爾阿里前鋒阿密特卡利同埋另一位阿聯酋國腳奧馬鴨都拉文爭奪。由於恒大捧走今屆亞冠盃，所以鄭智第二度得獎嘅呼聲好高。亞洲足協年度頒獎禮下星期日會喺印度嘅新德里舉行，香港足總會長霍震霆同總幹事袁文川都會飛過去出席。