上周五晚「張家界」馬主梁青華的中式酒樓正式開張，他邀請一班老友到場剪綵，包括歌星吳國敬、藝員謝雪心等，場面熱鬧。
梁青華除了酒樓生意，本身亦是鐘錶店老闆。他對表示「張家界」可能是本港職業賽馬史上，最耐冇出賽的馬，此匹自購新馬2011年到港，僅2012年5月及6月跑過兩仗，自當年6月一役得季軍後，自此未再出賽，休養了約三年半。梁青華話佢同其他三位合夥馬主，可算夠耐性，大家都一直期望「張家界」在專醫傷患馬的吳定強手上，會有奇蹟出現，但早前強哥對他們好坦白咁講，「張家界」的蹄甲真係好難醫得番，釘唔到甲，意味復出機會渺茫。所以梁青華將會與其他三位合夥馬主，商討「張家界」退役事宜。
講開馬匹退役，全港最高分灰馬「醒目波幅」上周末跑完流鼻血，馬主柯亦凌丈夫傅果權表示，將安排牠退役，運往澳洲牧場頤養天年，希望馬兒開開心心地生活。除了傅果權一家人及練馬師呂健威外，騎過「醒目波幅」的鄭雨滇、楊明綸及羅理雅，都表示好唔捨得這匹灰馬。