喺香港做足球新聞，其實局限都幾大，尤其係報紙，版位所限，做親都係強隊，唔係美斯就C朗，想介紹吓啲冷門球隊或球員都難，鬼叫曼聯、C朗多人關心，點擊率高咩！難得李斯特城爬到上榜首，嚟緊又對曼聯，小弟同牽牛兄決定用我哋呢度加埋千幾字去介紹吓呢隊英超異軍。
講起李城球員，好多人都第一時間諗起占美華迪同馬列斯呢兩位人兄，因為佢哋係咁入波，但坊間一啲網媒都有介紹佢哋，唔少球迷都聽過佢哋個名，所以我同牽牛兄就諗，究竟誰是李城嘅第三功臣！通常一隊波嘅無名功臣，都係佢哋嘅防中，而李城真係好眼光，今季買咗一位表現勁過名氣好多嘅防中返嚟，就係尼高路簡迪（右）。
尼高路簡迪𠵱家拍住曼聯青訓出身嘅「飲水哥」真禾特打防中，佢兩個嘅分工幾清晰。真禾特係中場樞紐，場均傳球次數拋離其他隊友幾條街。至於簡迪就做多啲防守掃蕩，仲做埋今季英超嘅攔截王！簡迪場均攔截4.2次，同阿仙奴嘅哥斯尼並列全英超第一。除咗攔截傳球強，簡迪都唔驚埋身肉搏，佢今季場均四次成功嘅鏟截，排英超第四。綜合攔截同鏟截兩項數據嘅排名，簡迪絕對係今季英超最有效率嘅防中。
除咗簡迪，仲有位球員令小弟印象深刻，就係左路一條龍嘅舒洛比。佢可以踢左閘，又可以踢左翼，兩個位都踢得唔錯。李城隊內嘅突破王當然係馬列斯，而排第二嘅就係舒洛比。有時佢踢左閘，就會安排馬克艾拜頓踢左翼。由於艾拜頓係右腳仔，成日帶埋去大位，所以舒洛比成日可以衝上嚟喺邊路做叠瓦。舒洛比真係實而不華，大家可以留意吓。
文：咖喱