星期日幾乎全日都關心區議會選舉，小弟家住嘅選區，「禮義廉」鐵票威力太大，就算動員埋家母，仍然幫唔到民主派候選人。最可惜係黃埔，靚女傘兵未能成功滅鼠，事後仲喺網絡睇到該區一位懶係中立嘅女士話，呢個係選舉唔係選美，所以話靚女傘兵應該輸。
凡事睇表面就注定俾人搵笨，好似摩連奴嘅履歷咁，又贏過歐聯又贏過英超，所到之處冇話一支球隊冇冠軍，不過最唔好就係把口，包括第一次接手車路士時，就寸前任領隊雲尼亞里（中）冇料到，正所謂前人種樹後人開花，摩連奴當年嘅冠軍陣容其實好多都係雲尼亞里砌出嚟，林柏特、馬基列尼、杜夫等，又打起青訓產品泰利，臨走前仲幫寸王買到杜奧巴同洛賓，相反摩連奴買嘅葡萄牙幫，係卡維奴叫做好啲，保羅費拉拿等真係唔掂。做人要識飲水思源，所以摩連奴真係要多謝雲尼亞里。
64歲嘅雲尼亞里，教練履歷冠軍真係不成比例，帶費倫天拿拎意大利盃冠軍，帶華倫西亞贏西班牙盃，但佢將一支弱旅改造成黑馬，威力真係唔講得笑。李斯特城上季尾搞到要護級，今時今日升上榜首，絕對唔係好彩，13戰贏八場，足足多車路士四場，占美華迪加埋馬列斯兩人嘅入球已經多過車仔成隊。
林柏特、泰利等等，都係雲尼亞里提拔成為球星，雲帥眼光真係唔差，不過周六嘅英超榜首大戰，雲帥都有啲捉蟲，因為13年佢仲教緊摩納哥時，就一手從里昂挖走法國新星，並大膽畀佢頂替法卡奧個位，呢位新星就係安東尼馬迪爾。
文：牽牛