區議會選舉，左丁山全家人飲完茶之後，去票站投票選區議員，票站內幾乎無人，左丁山唔駛兩分鐘就投完票走番出嚟，呢個選區有三人角逐，一個係老鬼求連任，一個係青年不知何許人也，一位話係街坊中年人。既然要挑戰老鬼連任，新候選人係唔係要多啲宣傳自己呢？竟然唔係噃，選民連佢地嘅學歷資歷都唔知，認真怪事。
投票之後，我地一致覺得競選氣氛冷淡，投票率會幾低噃。點知道全部估錯晒，全港投票率有47%，創歷史新高，大概係建制派（主要係工聯會與民建聯）希望大勝，猛咁谷票，另外雨傘及激進兵團刺激不少年青人第一次出嚟投票。投票率高，選舉結果係建制派冇贏，民主黨冇輸，激進派全部落選，傘兵初試啼聲，反而搶到八席。但泛民兩位老鬼就慘咯，超級區議會立法會議員何俊仁與馮檢基均受同路人𠝹票慘敗，明年唔可以借區議會出選立法會，必須搵地區落腳參加直選，即係又要擠壓同路人，一定導致泛民內部不穩，流失選票。民建聯亦有兩位立法會議員葛珮帆與鍾樹根落選，但建制派素有辦法配票，葛鍾兩位還有機會從直選連任立法會議員嘅，兩人之中，葛珮帆就麻煩啲噃，同屬建制派嘅龐愛蘭在火炭區大勝，明年點會甘心屈居葛珮帆之後呀，呢兩位女士明年一定互相搶新界東選票，令建制派大傷腦筋，不知如何配票。
西環對今次區議會選舉結果，未必好高興，佢地熟悉嘅老對手何俊仁、馮檢基失利，本應歡喜，但有八名傘兵上咗嚟，對明年傘兵爭入立法會，甚有鼓勵性，呢班人有強烈反共政治傾向，與西環冇偈傾，仲麻煩過劉慧卿多多聲。據一啲路邊社消息，為防範於未然，中央將甚麼不成氣候嘅所謂「港獨」視為疆獨、台獨一類，定性為敵我矛盾，要嚴厲對付。傘兵不是港獨，只係怕有人誤會、挑撥、無事生非，向傘兵打壓，令香港政情更兇險啫。政府有關部門素來怕咗區議會，今次不少新人湧現，豈止政府官員頭痛，連同區議會聯絡嗰啲公共事務（Public Affairs）人員，都要從新再做功課！