熊黛林（Lynn) 06年殺入香港模界火速爆紅，加上當年曾是「城嫂」身份，恃寵生驕，自言曾經囂張過脾氣又差，十年人事幾番新，轉戰影圈後，人也變得沉澱踏實，又與郭可盈的弟弟郭可頌打得火熱，愛情事業兩得意，昨日更有報道指她聖誕在日本沖繩結婚，不過就被經理人Kim代為否認，工作擺第一的Lynn現正默默保護戀情，繼續為事業搏殺。
統籌：林妙萍
採訪：顏英儀
攝影：郭賢興
化妝：Will Wong of Wearn Studio
髮型：Derrick Ng of Queens Private i Salon
熊黛林（Lynn）最為人記得的是與郭富城有過一段情，因敵不過7年之癢戀情告終，分手後上年8月傳出戀上郭可盈的弟弟郭可頌，戀上另一個「郭生」，昨日更有報道指兩人聖誕在日本沖繩結婚，不過就遭經理人Kim否認婚訊。問到Lynn近年專注內地發展如何跟男友維繫感情，她即時落閘說：「總之做嘢緊要，其他事可以遷就，𠵱家工作第一，有機會唔搏等幾時！」
錢夠用就得
每個女人都希望搵到Mr. Right，35歲的Lynn已屆中女之年齡，可會心急想嫁人？「媽咪前幾年都有催我，見到我咁忙都冇再催，當然想搵一個人陪吓，婚姻對我來講係一個穩定嘅關係，互相信任，但對方要有事業基礎，做女人一定要了解你嘅另一半，要為對方着想，將來另一半如果可以好似子丹識功夫，咁man就perfect！」另一半是否要有錢？「錢夠用就得喇，我又唔使坐私人飛機同幾千萬嘅車，要咁多做咩！」
由模特兒轉影圈，飾演一代宗師葉問的妻子張永成吸納了一班電影粉絲，《葉問3》將於聖誕黃金檔期上映，今次更有拳王泰臣參與演出，「可惜我同泰臣冇對手戲，今次第一次拍攝打鬥場面，喺狹窄嘅電梯入面子丹同泰國拳手對打，真係嚇到呆咗，空間細拳又快，有幾下都被撞到，又擦到下巴，如果打中相信會打甩下巴！」
身高變缺點
拍完《葉問3》燃起她做打女的決心，「都想做打女，覺得好過癮，我唔怕辛苦。」6呎高的Lynn殺入影圈，大家以為她一帆風順，但她有苦自己知，「都試過有低谷嘅時候，始終生得高，好多人都覺得冇男演員襯得起我，都有受到打擊，無論你點努力都好，有啲人只會睇你生得高，就好似冇機會發展落去咁，有一輪真係好唔開心好失望，直到近年先多番啲信心。」
不經不覺已入行近十年，經過時間歷練自覺變得沉穩踏實：「我覺得我個人沉澱咗，之前做model有少少成績就變得囂張，飄飄然咁，以前脾氣差又急躁，𠵱家乜都會慢慢嚟，感覺成熟咗。」
電影不歸路
熊黛林已忘記了有幾耐沒行過catwalk，最初拍戲都只是抱住試吓的心態，「有時都會懷念行騷嘅日子，不過既然已決定做演員，就唔會再諗番轉頭，反而想挑戰唔同角色，我成日都演好人，想試吓做一啲反差大嘅角色，例如壞人，霸道嘅角色。」
更多精采時尚內容，盡在 http://add.appledaily.com 。