贏完亞冠盃（下圖）之後，廣州恒大球員有幾日假去輕鬆吓，之後先至集訓備戰世冠盃。有內地網民噚日放咗張相上微博，見到恒大隊長鄭智帶埋老婆，同隊友郜林、劉健等去咗澳門玩兩手，引嚟唔少網民留言。有啲人寸佢哋睇住輸晒亞冠盃啲獎金，有啲就網民就幫班球員反擊，話放假賭自己辛苦賺嚟嘅錢冇問題，總好過有啲貪官拎晒公款去賭啦。不過，因為張相冇日期，所以有網民懷疑呢張係舊相嚟。我求大俠覺得小賭怡情，唔好沉迷落去，搞到輸晒副身家咪得囉，同埋有老婆喺旁邊睇住，相信鄭智佢哋都唔會賭得太過份嘅。
另外，恒大下個月就會去日本踢世冠盃，唔少內地球迷都想去日本撐場。相比恒大亞冠盃決賽嘅門票，世冠盃門票就真係良心價，好似恒大喺下月13號對CF阿美利加，最貴嘅飛都係8,000日圓，即係500港元多啲，最平嘅飛更加只係127港元。若果恒大贏到阿美利加，佢哋就會喺17號嘅四強對巴塞隆拿，呢場啲飛就貴啲，最平都要500港元左右。另外，世冠盃同亞冠盃賽制唔同，唔會限制只用四個外援，所以冇喺亞冠盃註冊嘅羅賓奴同阿倫杜格拉斯都可以為恒大披甲，呢支恒大會比踢亞冠盃嗰隊更強。