加里夫巴利（上圖）土豪上身，話想喺佢家鄉威爾斯間豪宅嘅後花園，起一個有三個洞嘅高爾夫球場。呢個高球場嘅設計仲非常特別，事關包含咗三個著名高球場最有特色嘅球洞，分別係皇家特奴嘅第八個洞、奧古斯塔嘅第11個洞，同埋鋸齒草嘅第17個洞。我求大俠都知呢位26歲皇家馬德里球星勁鍾意打高球，仲想掛靴之後轉做職業高爾夫球手，但係皇馬今季表現麻麻，仲啱啱喺西班牙國家打吡主場吞咗巴塞隆拿四蛋；家陣佢有時間諗玩樂，不如畀啲心機練波好過啦。
另外，巴利嘅皇馬隊友賓施馬又惹麻煩，事緣上周六場國家打吡賽前播放法國國歌《馬賽進行曲》悼念巴黎恐襲死難者，賓施馬喺播完國歌後隨即吐口水（下圖），除咗俾法國政客批評唔尊重死者之外，仲強烈要求法國足總逐佢出法國國家隊。賓施馬早前先至捲入法國國腳中場華布拿嘅性愛影帶事件，涉嫌出面勒索對方，呢單嘢經已搞到佢一身蟻，隨時要入冊，如今仲因國歌事件而畀人秋後算賬，睇嚟佢今季都唔慌會有心機踢波。