英國《太陽報》出名吹水唔抹嘴，尤其係啲轉會消息，我求大俠噚日都畀佢哋嘅體育頭條嚇一跳，竟然話朗尼去中超！原來係有中超土豪睇中呢位英格蘭隊長，所以接觸朗尼嘅經理人。雖然我求大俠覺得成事機會唔高，但完全睇到𠵱家中超嗰種豪氣，話唔定過一排會見到中超球會有意羅致美斯嘅新聞！
同艾歷臣再續師徒情？
上有好者，下面就自然識做，全世界都知國家主席習近平鍾意足球，所以喺習總上台之後，越嚟越多內地土豪玩中超，最出名嘅當然係許家印嘅廣州恒大，上星期六先至三年內第二次捧亞冠盃。最誇張嘅係，中超嚟緊五年嘅轉播權竟然加埋賣到成80億人民幣，即係97億港元。中超球會大把錢，點樣使好呢？最簡單直接嘅，梗係買球星返嚟，一來增加球會知名度，二來加強實力。據《太陽報》所講，某間中超球會好想買世界級球星，就睇中咗曼聯同英格蘭嘅雙料隊長朗尼。
網民：土豪出手救曼聯
雖然段稿就冇提邊間球會，但以我求大俠嘅猜測，就覺得係上海上港。因為講到今年最有野心大搞嘅中超球會，就肯定係上港，佢哋年頭重金邀請孔卡返中超，又簽咗前新特蘭射手基恩，目標就係要挑戰恒大。今季，上港挑戰失敗，應該想再搵啲實力更強嘅外援返嚟幫手；加埋上港教練係艾歷臣，佢以前教英格蘭嗰陣都同朗尼合作過。雖然恒大都夠錢斟朗尼，但教練史高拉利鍾情巴西兵，真係傳佢哋簽尼馬嘅可能性仲高過朗尼啦！
報道話，朗尼經理人冇明顯拒絕，話唔排除任何可能性。不過，朗尼今年先至30歲，同曼聯份約仲有三年有多，估計佢唔會咁快想去中超啩。呢單傳聞喺香港同內地嘅論壇都引起好多網民討論，但大部份人都唔信會成事，更多網民就藉呢單傳聞狂抽朗尼水。有網民話：「朗尼嚟中國一季，估計可以肥到變安察洛堤。」亦有人話：「睇嚟有魔迷土豪頂唔順，要出手拯救曼聯。」